Gwamnan Jihar Kaduna, Uba Sani, ya ce bai taɓa faɗin wani abu mara kyau game da tsohon gwamnan jihar, Nasir El-Rufai, ba, duk da rade-radin da ake yi kan dangantakarsu da kuma ci gaba da tsare tsohon gwamnan.
Uba Sani ya bayyana hakan ne yayin wata hira da gidan talabijin na Trust TV a cikin shirin Daily Politics ranar Talata, lokacin da aka tambaye shi ko yana fargabar tasirin siyasar El-Rufai gabanin zaɓen 2027 da kuma yadda yake kallon ci gaba da tsare tsohon gwamnan tun watan Fabrairu.
Gwamnan ya ce har yanzu yana matuƙar girmama El-Rufai, kuma ba shi da wata matsala da shi.
Ya ce, “A gaskiya, ba ni da wata matsala da shi. Idan kun saurare ni da kyau, ban taɓa faɗin wani abu mara kyau game da shi ba, kuma ba zan taɓa yi ba.”
Uba Sani ya kuma nesanta kansa da kalaman wani mai goyon bayan jam’iyyarsa da aka ruwaito yana cewa ya kamata a ci gaba da tsare El-Rufai har bayan zaɓe.
A cewarsa, mutumin da ya yi wannan magana yana bayyana ra’ayinsa ne, ba wai yana magana ne a madadinsa ba.
Gwamnan ya ƙi bayyana cikakkun bayanai kan matakan da ya ɗauka a ɓoye dangane da halin da El-Rufai yake ciki, yana mai cewa ya fi son a bar irin waɗannan batutuwa a sirrance saboda girmamawa.
Ya ƙara da cewa bai taɓa janye ko musanta wani abu da ya faɗa a baya game da El-Rufai ba, yana mai jaddada cewa matsayinsa bai sauya ba tun lokacin da ya karɓi mulki.
Uba Sani ya kuma ce yana ci gaba da tuntubar tsofaffin gwamnonin Kaduna domin samun shawarwari kan harkokin mulki da ayyukan raya ƙasa.
Ya ba da misalin tsohon gwamnan jihar, Ahmed Makarfi, wanda ya ce ya tuntuba kan wasu ayyukan tituna, ciki har da hanyar Soba zuwa Zariya. A cewarsa, Makarfi ya ba shi shawara kan hanyar tare da yabawa tsarin da aka bi wajen gina ta.
Gwamnan ya jaddada cewa babu wani tsohon gwamna da yake da cikakken ilimi ko hikimar da ta fi ta kowa, don haka ya kamata shugabanni su kasance masu tawali’u da sauraron shawarwari.
Ya kuma ce ya tuntubi tsohon Mataimakin Shugaban Ƙasa, Namadi Sambo, domin samun zanen wani aiki, ciki har da na Gidan Gwamnatin Kaduna.
Uba Sani ya ce ya fahimci cewa shugabanci na zuwa da ƙalubale, kuma tun farkon hawansa mulki ya bayyana cewa zai fuskanci matsaloli a yayin gudanar da ayyukansa.
