Gwamnatin Jihar Kaduna ta ce tana da burin mayar da yara kusan 187,000 da ba sa zuwa makaranta cikin shekara ɗaya, domin rage matsalar rashin samun ilimi a jihar.
Kwamishinan Kuɗi na jihar, Ibrahim Tanko Mohammed, ne ya bayyana hakan yayin ƙaddamar da shirin gidauniyar Street to Scholars Foundation a Kaduna. Ya ce gwamnati na son ganin babu yaran da suka rage a waje ba tare da samun ilimi ba nan da shekara guda.
Wanda ya kafa gidauniyar, Sara Adeniyi, ta ce za su tallafa wa yara kusan 135 a shekarar farko, masu shekaru daga biyar zuwa 24, ta hanyar ba su damar samun ilimin firamare da sakandare, ƙarin karatu da koyon sana’o’i.
Ta ce shirin zai kuma taimaka wajen haɗa wasu yaran da iyalansu idan hakan ya dace, tare da ci gaba da tallafa musu har su samu ilimi ko sana’ar da za ta taimaka musu dogaro da kansu.
Kwamishinan Tsare-tsare da Kasafin Kuɗi na jihar, Mukhtar Ahmed Monrovia, ya ce talauci, rashin isasshen tallafi da ƙarancin damar samun ilimi na daga cikin abubuwan da ke hana yara zuwa makaranta.
Gwamnatin jihar da gidauniyar sun rattaba hannu kan yarjejeniyar haɗin gwiwa a ranar 8 ga Satumba, 2026, domin tallafa wa yara marasa zuwa makaranta da waɗanda ke rayuwa a kan tituna.
Sai dai, yayin da gwamnati ta sanya burin dawo da yara 187,000 makaranta cikin shekara guda, gidauniyar ta ce za ta fara tallafa wa yara 135 ne a shekarar farko.
