Gwamnatin Tarayya ta ƙaddamar da sabon tsarin lamunin gidaje ba tare da riba ko kudin ruwa ba a Kano, inda ta buɗe damar shiga shirin ga dukkan masu ba da gudummawa ga Asusun Gidaje na Ƙasa (NHF), ba tare da la’akari da addini ko yankin da suke ba.
Shirin, wanda Hukumar Ba da Lamunin Gidaje ta Tarayya (FMBN) ta ƙaddamar, yana amfani da tsarin haya da mallaka, inda wanda ya cancanta zai riƙa biyan kuɗin haya bisa ƙa’idojin shirin har sai ya mallaki gidan.
Tsarin ya dogara ne da tsarin kuɗi na Musulunci na Ijarah Muntahia Bittamleek, wanda ke ba mutum damar amfani da gida ta hanyar haya kafin ya mallake shi bayan kammala biyan kuɗin da aka amince da shi.
An bayyana cewa duk masu ba da gudummawa ga NHF da suka cika sharuddan shirin za su iya neman amfana da shi. Ba a takaita damar ga Musulmi ko wani yanki na ƙasar ba.
An fara shirin ne da gidaje a Bichi, Jihar Kano, tare da shirin faɗaɗa shi zuwa sauran birane domin ƙara wa ’yan Nijeriya damar mallakar gidaje.
