Matatar Man Fetur ta Dangote ta ce tayin sayar da hannun jarinta ga jama’a ya jawo masu zuba jari daga ƙasashe 120 na duniya, ciki har da dukkan ƙasashe 54 na Afirka.
Tayin, wanda aka fara a ranar 14 ga Satumba, 2026, ya ƙunshi hannun jari biliyan 4.1 a farashin naira 525 kan kowane guda, da nufin tara kusan naira tiriliyan 2.15. An tsawaita lokacin sayen hannun jarin zuwa ranar 27 ga Oktoba domin bai wa ƙarin masu zuba jari damar shiga.
Shugaban rukunin kamfanonin Dangote, Aliko Dangote, ya ce sha’awar da masu zuba jari daga faɗin Afirka suka nuna ta tabbatar da cewa ’yan Afirka na son mallakar hannun jari a kamfanonin da ke samar da kayayyakin da suke amfani da su.
Manajan Daraktan matatar, David Bird, ya ce masu zuba jari daga ƙasashe 120 sun nuna sha’awar da ake da ita ga kamfanin da kuma makomarsa.
Kamfanin ya ce manufar sayar da hannun jarin ita ce bai wa jama’a damar mallakar wani kaso na matatar da cin gajiyar ci gabanta.
