Majalisar Dokokin Jihar Sakkwato ta amince da ƙudirin gyaran Kundin Tsarin Mulkin Nijeriya na 1999 domin bai wa jihohi damar kafa rundunonin ’yansanda na kansu.
LEADERSHIP Hausa ta ruwaito cewa majalisar ta amince da ƙudirin ne bayan Mataimakin Shugaban Masu Rinjaye na majalisar, Mustapha Abdullahi, ya gabatar da shi a zaman majalisar na ranar Laraba.
Da yake gabatar da ƙudirin, Abdullahi ya ce an tsara gyaran ne domin bai wa jihohi damar kafa rundunonin ’yansanda na kansu.
Ya bayyana cewa ɓangaren zartarwa ne ya aika da ƙudirin, wanda Majalisar Dattawa ta duba a ranar 24 ga watan Yuni, yayin da Majalisar Wakilai ta yi nazari a kansa a ranar 23 ga watan Yuli.
Daga bisani, an miƙa shi ga Majalisar Dokokin Jihar Sakkwato a ranar 22 ga watan Satumba.
A cewarsa, tsarin da ƙudirin ya tanada zai fayyace ayyukan rundunar ’yansandan tarayya da na jihohi domin inganta tsaro da magance matsalolin tsaro a sassan ƙasar nan.
Ya ce rundunar ’yansandan tarayya za ta mayar da hankali kan manyan laifukan da suka shafi jihohi, ta’addanci, laifuka a yanar gizo, tsaron iyakokin ƙasa, tsaron Babban Birnin Tarayya, da kuma kare kadarorin gwamnatin tarayya.
A ɗaya ɓangaren, ya ce rundunonin ’yansandan jihohi za su kasance masu kula da tabbatar da bin doka, wanzar da zaman lafiya da tsaro, kare rayuka da dukiyoyi, da kuma binciken laifukan da aka aikata a cikin jihohinsu.
