Bikin baje kolin fasahar zamani na duniya karo na 5, wanda ya kasance wani taro na musamman da aka sadaukar don karfafa kasuwancin fasahar zamani da kuma hadin gwiwar masana’antu, zai gudana daga ran 23 zuwa 27 ga Satumba a Hangzhou, babban birnin lardin Zhejiang na gabashin kasar Sin, inda fasahar kirkirarriyar basira ta AI za ta kasance batun da zai fi daukar hankali, kamar yadda wani jami’i ya bayyana a jiya Litinin.
Mataimakin ministan cinikayya na kasar Sin, Yan Dong, ya bayyana cewa, fiye da kashi daya bisa uku na masu baje kolin za su mayar da hankali ne kan fasahar kirkirarriyar basira ta AI, tare da gabatar da cibiyoyin gwajin aikace-aikacen AI na bai-daya a karon farko, inda za a nuna cikakken tsarin ayyukan sabbin kirkire-kirkire da ya kunshi manyan samfuran AI, da manhajojin AI a fannoni daban-daban na masana’antu da kuma na’urori masu aiki da basira.
Bikin baje kolin zai kasance ne a filin da ya kai fadin murabba’in mita 170,000, inda masu baje koli daga kasashen waje za su mamaye kusan kashi 20 cikin dari na fadin wurin. Tuni dai adadin rumfunan baje kolin na ‘yan kasashen waje ya zarce daukacin na baje kolin da aka yi a baya.
Malaysia da Hungary za su kasance manyan baki na musamman a tsakanin kasashe masu halarta, yayin da wakilan kasashe da yankuna 121 da kungiyoyi 29 na duniya suka tabbatar da halartarsu.
Ya zuwa yanzu dai, bikin baje kolin ya jawo hankulan kusan manyan masu sayayya 40,000, ciki har da sama da 12,000 daga kasashen waje, inda ake sa ran za a ba da sauton kayayyaki na kasa da kasa har na zunzurutun kudi dala miliyan 977. (Mai fasssara: Abdulrazaq Yahuza Jere)
