Wata uwargida a Birtaniya mai shekaru 29, mai suna Sarah Ward da mijinta, Benn Smith yanzu sun haifi yara hudu acikin watanni tara.
A wani rahoto da jaridar legit.ng ta bayar, ta bayyana cewa, Ma’auratan sun fara maraba da da mai suna Freddie bayan watanni biyu da haihuwa sai abun mamaki ya rufe ma’auratan bayan samun bushara daga asibiti cewa Sarah ta sake samun juna biyu dauke da ‘ya’ya uku.
Labarin ‘yan uku ya ba ma’auratan mamaki, domin ba su taba tsammanin hakan ba nan kusa.
Da take ba da labari, Sarah ta ce: “Muna so mu haifi akalla yara biyu ne kawai. Ganin yadda yaro na Freddie ya dauki lokaci mai tsawo acikina, sai nayi tunanin cewa zan sake dadewa ban haihu ba.
“Na yi mamakin gano cewa na sake samun juna biyu nan da nan.
“Na razana sosai, da kyar na warke daga jinyar Haihuwar Freddie.
“Har yanzu ina sanye da kayan haihuwa. Ina mamakin yadda a duniya zan iya jure wata Sabuwar haihuwa.”
