Kotun Majistare da ke Kano ta gurfanar da wani mutum, Nura Usman, da mahaifiyarsa, Izzatu Aminu, bisa zargin haɗa baki da yunƙurin aikata kisa.
Ana zargin mutanen biyu da haɗa baki don kashe mahaifin Nura, Alhaji Usman Shanono, a unguwar Dantsinke da ke Kano.
Rahotanni sun ce sun ɗauki hayar wani mutum kuma suka biya shi Naira 500,000 domin ya kashe Shanono.
Sai dai wanda suka ɗauka aikin ya sanar da Shanono game da shirin maimakon ya kashe shi.
Daga nan, aka shirya ƙaryar cewa an kashe Shanono domin waɗanda ake zargin su yi tunanin shirin ya yi nasara.
Wanda aka ɗauka aikin ya karɓi agogon Shanono da wasu kayansa domin ya nuna musu cewa an kashe shi.
Daga baya, waɗanda ake zargin suka sanar da mutane cewa an kashe Shanono, lamarin da ya sa ‘yan uwa da makusantansa suka taru domin jana’izarsa.
Sai dai asirinsu ya tonu lokacin da Shanono ya bayyana tare da jami’an tsaro, inda ya bayyana cewa sun shirya a ce ya rasu.
Mai shari’a Sakina Amina Yusuf ta ɗage sauraron ƙarar zuwa ranar 7 ga watan Satumba, 2026, domin ci gaba da shari’ar.
