Tun bayan kaddamar da bayar da lambar yabo ta Tiantan ta bikin fina-finan kasa da kasa na Beijing ko BJIFF, bikin ya zama muhimmin dandali na musaya, da tattaunawa dangane da batutuwan da suka shafi fina-finai tsakanin mashiryan su na Sin da na sauran sassan kasa da kasa, kamar dai yadda mahalarta bikin na BJIFF karo na 16 suka bayyana.
A jiya Alhamis 16 ga watan nan ne aka bude bikin BJIFF na wannan karo, bikin da ya hallara fina-fina 1,826 daga kasashe da yankuna 139, wadanda suka yi rajistar shiga takarar lambar yabo ta Tiantan, inda aka zabi 16 daga cikinsu domin fafata takarar lashe lambar yabon ta Tiantan.
Daraktan sashen watsa labarai na kwamitin kolin JKS na birnin Beijing Sun Junmin, ya ce bayan shekaru 16 ana raya wannan biki, BJIFF ya zamo muhimmin dandali na baje fina-finan Sin, da yayata musaya, da koyi da juna tsakanin fina-finan Sin da na kasashen ketare. (Saminu Alhassan)
Discussion about this post