Firaministan kasar Canada Mark Carney, da ministan harkokin wajen kasar Sin dake ziyarar aiki a Canada mista Wang Yi, sun sha alwashin zurfafa alakar kasashensu, da bunkasa cudanya tsakanin sassa daban daban.
Da yake tabbatar da hakan a jiya Juma’a, firaminista Carney, ya ce kasarsa na goyon bayan aniyar kasar Sin ta karbar bakuncin taron shugabanni, na hadin gwiwar raya tattalin arzikin kasashen yankin Asiya da Fasifik ko APEC, kuma kasarsa ta shirya yin aiki tare da kasar Sin, wajen rayawa, da aiwatar da manufar cudanyar sassa mabambanta, ta yadda hakan zai samar da tarin gudunmawa ga bunkasar tattalin arzikin duniya, da zaman lafiya da daidaito tsakanin kasa da kasa.Wang, ya ce shaidu sun tabbatar da cewa, kyakkyawar alaka tsakanin Sin da Canada na haifar da gajiya ga kasashen biyu, kuma ta dace da burikan dukkanin sassa, kana ta yi daidai da kyakkyawan zabin Canada.
Daga nan sai ya jaddada cewa, babu wani cin karo tsakanin manyan kudurorin kasashen biyu, kuma sassan biyu na da tarin damammaki na aiwatar da hadin gwiwa.A nasa bangare kuwa, Wang Yi cewa ya yi, kamata ya yi sassan biyu su martaba manufar cudanyar mabambantan sassa, da dokokin kasa da kasa, da cin gashin kai a manyan tsare-tsare, yayin da suke kara goyon bayan cinikayya cikin ‘yanci, da budadden tsarin tattalin arzikin duniya.
Kazalika, a yayin ziyarar ta mista Wang Yi a Canada, ya tattauna da ministar harkokin wajen kasar Anita Anand, da kuma tsohon firaministan kasar Jean Chretien. (Saminu Alhassan)
