Cibiyar kasuwanci ta CBA karkashin hukumar bunkasa cinikayya da raya masana’antu ta kasar Kenya ko KNCCI, ta sanya hannu kan takardar fahimtar juna, tare da majalissar raya tattalin arziki da cinikayya ta Sin da Afirka ko CAETPC, da nufin ingiza noma da cinikayyar lemar kwadi ko “mushroom”.
Wata sanarwa da hukumar KNCCI ta fitar a ranar Juma’a a birnin Nairobin kasar ta Kenya, ta ce bisa hadin gwiwa da cibiyar CAETPC dake birnin Changsha na lardin Hunan dake tsakiyar kasar Sin, an amince da kafa tsarin aiki mai kunshe da hadin gwiwar samar da kwarewar fasahohi, da gina sanin makamar aiki, da musayar kwarewa, don kyakkyashe kwararru, da habaka cinikayyar lemar kwadi mai karko a Kenya, da ma sauran kasashen gabashin Afirka.
Da yake tsokaci kan hakan, shugaba hukumar KNCCI Erick Rutto, ya jaddada muhimmancin shirin ta fuskar ingiza ci gaban kanana da matsakaitan masana’antu, da bunkasa samar da isasshen abinci, da samar da guraben ayyukan yi a bangaren noma, ta hanyar gabatarwa manoman kasar da sabbin fasahohin zamani da dabarun raya kasuwanci na zamani.
Sanarwar ta kara da cewa, cibiyar CBA za ta dauki nauyin dukkanin shirye-shirye na bunkasa kwarewa, yayin da hukumar CAETPC za ta tsara gabatar da kwararru a fannin noma na kasar Sin ga kasar Kenya, da samar da kayan aiki na zamani, da hada ‘yan kasuwa da damammaki daga masu zuba jari na Sin.
Bugu da kari, sanarwar ta ce za a fara zartar da takardar ta fahimtar juna ne da kwas na mako guda, don samun kwarewa a fannin noman lemar kudi, kwas din da za a fara a mako mai zuwa. (Mai fassara: Saminu Alhassan)
