Da karfe 8 na yammacin jiya 16 ga watan Fabrairu, babban rukunin gidajen rediyo da talabijin na kasar Sin ko kuma CMG a takaice, ya gabatar da wani kasaitaccen shagali na murnar shiga sabuwar shekarar gargajiya ta kasar Sin. Shirye-shiryen shagalin sun kunshi al’adu, da fasahohin zamani gami da wasu sigogi na kasa da kasa da dama, wadanda suka nishadantar da mutanen kasar Sin a duk fadin duniya da ma ’yan kasashen waje da dama, don murnar shiga sabuwar shekarar gargajiya wato shekarar Doki cikin annashuwa da farin-ciki.
Kwarya-kwaryar kididdigar da aka yi ta nuna cewa, zuwa karfe 12 na daren ranar Litinin, jimillar mutanen da suka kalli shagalin CMG kai tsaye ta hanyoyi daban-daban ya kai miliyan 677, inda yawan kalle-kalle da aka yi bisa sabbin hanyoyin sadarwa ya kai biliyan 13.5.
Kazalika, shagalin CMG din na bana ya kara taka rawa a kasashen waje, inda adadin kafafen yada labaran kasa da kasa da suka watsa shagalin ya tasam ma dubu 4, adadin da ya karu da kaso 37.95 bisa dari, idan aka kwatanta da na bara. Kana, adadin kalle-kallen shagalin kai-tsaye da aka yi a dandalolin sada zumunta na CCTV.com ya kai miliyan 87.29, adadin da ya karu da kaso 20 bisa dari a kan na bara. (Murtala Zhang)
