Da yammacin jiya 16 ga watan Fabrairu, babban rukunin gidajen rediyo da talabijin na kasar Sin ko kuma CMG a takaice, ya gabatar da wani kasaitaccen shagali na murnar shiga sabuwar shekarar gargajiya ta kasar Sin. Shirye-shiryen shagalin sun kunshi al’adu, da fasahohin zamani gami da wasu sigogi na kasa da kasa da dama, wadanda suka nishadantar da mutanen kasar Sin a duk fadin duniya da ma ’yan kasashen waje da dama, don murnar shiga sabuwar shekarar gargajiya wato shekarar Doki cikin annashuwa da farin-ciki. Ya zuwa karfe 8 na safiyar yau Talata, yawan kalle-kallen shagalin a cikin gidan kasar Sin ta hanyoyi daban daban ya kai kimanin biliyan 23 da miliyan 63, adadin da ya karu da kaso 37.3% bisa na bara.
CMG ya kuma yi amfani da harsuna 85 wajen gabatar da shagalin ga kasashen duniya, kuma rahotanni masu alaka da shagalin da kafar CGTN ta CMG ta bayar har sun samu mutane kimanin biliyan 2 da miliyan 309 a fadin duniya, a yayin da an kalli shirye-shiryen bidiyo masu alaka har sau miliyan 843, adadin da ya karu da kaso 32.85% da kuma 43.61% bisa na bara. Har wa yau, adadin kafafen yada labaran kasa da kasa da suka watsa shagalin ya tasam ma dubu 4, adadin da ya karu da kaso 37.95%, idan aka kwatanta da na bara.
Discussion about this post