Babban rukunin gidajen rediyo da talabijin na kasar Sin ko kuma CMG a takaice, da ofishin jakadancin Sin da ke kasar Italiya, sun hada gwiwa don gudanar da wani bikin kade-kaden fim na kasashen biyu mai taken “Haduwar Bikin Bazara Da Wasannin Olympics Na Lokacin Sanyi” a Rome, fadar mulkin kasar Italiya kwanan baya, bikin da ya kasance daya daga cikin bukukuwa masu kayatarwa da CMG ya shirya masu taken “Share Fagen Bikin Bazara, Duniya Na Kallon Shagulgulan CMG Tare”. Shugaban majalisar wakilan kasar Italia, Lorenzo Fontana ya gabatar da sakon taya murnar shirya bikin, inda a cewarsa, yayin da ake gudanar da gasar wasannin motsa jiki ta Olympics ta lokacin hunturu ta bana yanzu haka a Italiya, bikin CMG ya shaida mana ruhin Olympics, da lalubo sabuwar hanyar tallata ruhin wasannin motsa jiki, tare kuma da kafa dandali mai matukar muhimmanci ga kara samun fahimtar juna tsakanin mabambantan wayewar kai.
A sakon nasa kuma, mataimakin shugaban sashin fadakar da al’umma na kwamitin kolin jam’iyyar kwaminis ta kasar Sin, wanda kuma shi ne shugaban CMG, Shen Haixiong, ya gabatar da jawabi ta kafar bidiyo cewa, a shekara ta 2022, gasar wasannin motsa jiki ta Olympics ta lokacin hunturu ta Beijing ta hadu da bikin bazara na shekarar damisa ta kasar Sin. Kuma a shekarar da muke ciki, gasar ta hadu da bikin bazara na shekarar doki. A daidai wannan lokaci, bikin kade-kaden fim da CMG ya shirya a birnin Rome, ya sa mabambantan al’adu suka kara cudanya da mu’amala, inda jama’ar Sin da Italiya suka kara samun fahimtar juna da sada zumunta, tare da sanya sabon kuzari ga mu’amalar al’adun kasashen biyu. (Murtala Zhang)
