Babban rukunin gidajen rediyo da talabijin na Sin wato CMG ya shirya kuma ya gudanar da taron tattaunawa na duniya na “Sin a lokacin bazara: ci gaban Sin, dama ga duniya” a ran 20 ga watan nan da muke ciki a Bangkok hedkwatar Thailand. Kuma shugaban CMG Shen Haixiong ya yi jawabi ta bidiyo. Jakadan Sin a Thailand Zhang Jianwei da shugaban kwamitin harkokin waje na majalisar dattijai ta Thailand Nirat Yoopakdee da sauran jami’ai sun halarci taron kuma sun yi jawabi. Sauran wadanda suka halarta sun hada da ‘yan siyasa da ‘yan kasuwa da masana, da wakilan kafafen yada labarai na Sin da Thailand sama da 200.
Shen Haixiong ya bayyana cewa, idan duniya ta yi kyau, to Sin za ta yi kyau, idan Sin ta samun ci gaba, to duniya za ta ci gajiya. Ya ce CMG yana son yin amfani da fa’idodinsa na watsa labarai na zamani dake hade da mabambantan dandaloli da fa’idodin kirkire-kirkire na fasaha, da kuma albarkatun kafafen yada labarai, don gaggauta ba duniya damar cin gajiyar sakamakon zamanintar da al’umma da Sin take samu, da kuma gabatar da sabbin damammakin ci gaba mai inganci na Sin ga abokanta a duniya, da kuma hada hannu don gina sabon dandalin kirkire-kirkire na fasaha da ke amfanar bil’adama, ta yadda za a shimfida yanayi mai kyau ga bil’adama, inda kowa ya ke da kyakkyawar wayewar kai da kuma hadin gwiwa a wannan bangare don cin gajiya tare.(Amina Xu)
