A kwanakin baya hukumar tace Fina-finai ta Jihar Kano ta sanar da dakatar da wasu daga cikin bukukuwan da ake gudanarwa bayan an ɗaura aure da sauran tarurrukan biki da ake gudanarwa a cibiyoyin manyan taruka a faɗin jihar, Shugaban Hukumar, Abba El-Mustapha, shi ya sanar da dakatarwar a cikin wata sanarwa da Jami’in Hulɗa da Jama’a na hukumar, Abdullahi Sulaiman, ya fitar.
A cewar sanarwar, matakin wani ɓangare ne na ƙoƙarin da hukumar ke yi na tabbatar da bin ƙa’idoji da kula da ayyukan manyan cibiyoyin taruka a faɗin jihar, El Mustapha ya ce an janyo hankalin hukumar dangane da irin waɗannan tarukan da ake gudanarwa waɗanda kuma suka ci karo da koyarwar addini, da kuma al’adun al’ummar Jihar Kano, inda ya ƙara da cewa mafi yawancin tarukan ana kwaikwayon ƙasashen turawa wajen aiwatar da su.
“Saboda haka, hukumar ta dakatar da wannan tarukan domin kare al’adu, ɗabi’u da addini na mutanen Jihar Kano,” in ji sanarwar.
A cewar sanarwar, wannan matakin da hukumar ta ɗauka ya zama dole a matsayin wani ɓangare na aikin hukumar wajen tsaftace ayyukan nishaɗi da kuma tabbatar da cewa ana gudanar da tarurrukan jama’a daidai da ƙa’idodin al’adu da addini na jihar.
Sanarwar ta jaddada cewa hukumar tana maraba da duk wani nau’in nishaɗi wanda zai ƙayatar a bukukuwan aure da sauran tarurrukan zamantakewa, muddin sun inganta ɗabi’a tare da girmama al’adun mutane da kuma bin koyarwar addini. A cikin sanarwar an ce hukumar ta ce nishaɗi ya kasance muhimmin ɓangare na bukukuwa idan aka gudanar da su bisa ƙa’idojin ɗabi’un da aka amince da su.
Hukumar ta ƙara da umurtar dukkan cibiyoyin tarurruka, masu jagorantar taruka (MC) da sauran masu ruwa da tsaki da ke da hannu a shirya tarurruka, da su bi umarnin da aka gindaya masu, tana mai gargaɗin cewa duk wani mutum ko ƙungiya da aka samu da karya wannan dakatarwar na iya fuskantar hukuncin da ya dace bisa ga dokokin da hukumar ta tanada, hukumar ta kuma yi kira ga mazauna jihar da su goyi bayan ƙoƙarinta ta hanyar bayar da rahoton duk wani taro ko MC da aka samu yana karya doka ko kuma aiwatar da ɗaya daga cikin ayyukan da aka dakatar.
