Hukumar Bunƙasa Masana’antar Sukari ta Ƙasa (National Sugar Development Council – NSDC) ta bayyana shirin ƙasar na jawo zuba jarin da ya kai dala biliyan 7.1 ($7.1bn) a fannin sarrafa sukari a ƙarƙashin kashi na biyu na Tsarin Bunƙasa Sukari na Ƙasa (Nigeria Sugar Master Plan – NSMP II), da nufin cimma wadatar sukari a cikin gida da kuma daƙile asarar kuɗaɗen ƙasashen waje.
Babban Sakataren Hukumar ta NSDC, Kamar Bakrin, ya bayyana cewa wannan gagarumin shiri na da nufin samar da sukari aƙalla metric ton miliyan 1.7 zuwa miliyan 2 a duk shekara a cikin gida, wanda hakan zai kawo ƙarshen shigo da ɗanyen sukari (raw sugar) daga ƙasashen ƙetare da ake kashe ɗaruruwan miliyoyin daloli a kansa duk shekara.
A ƙarƙashin wannan sabon tsari na zuba jari, an tsara buƙatar filayen gonakin noman rake da suka kai hekta 250,000 a faɗin jihohin da suka dace da noman, tare da kafa sabbin masana’antun sarrafa sukari da za su haɗa da sarrafa sinadarin ethanol da samar da wutar lantarki daga ragowar ganyen rake (bagasse). Haka kuma, an kiyasta cewa shirin zai samar da sabbin ayyukan yi sama da 110,000 ga matasa tare da farfaɗo da tattalin arziƙin yankunan karkara.
Hukumar ta NSDC ta jaddada cewa tana haɗin gwiwa da manyan kamfanonin sarrafa sukari da suka haɗa da Dangote Sugar Refinery, da BUA Foods, da Golden Sugar Company (Flour Mills of Nigeria) tare da sauran sabbin masu zuba jari na cikin gida da na ƙasashen waje, ta hanyar samar musu da yanayi mai kyau, da tsaro a gonaki, da rangwamen haraji domin tabbatar da an cimma muradun cin gashin kan ƙasar a fannin sukari.
