A watan Maris, an fitar da sabbin bayanan tattalin arziki na watanni 2 na farkon bana na kasar Sin. Bana ita ce shekarar farko da aka fara aiwatar da shirin ci gaban tattalin arziki da zamantakewar al’ummar Sin na shakaru biyar-biyar karo na 15. Kasar Sin ta samu gagarumar nasara yayin da ake fuskantar karuwar hadarin siyasar yanki da kuma rashin tabbas. Ko mene ne dalilin hakan?
Shiri karo na 15 ya jaddada wajibcin nacewa ga ingantaccen ci gaba, da kuma inganta dogaro da kai a fagen fasaha mai zurfi. Masu zuba jari na duniya sun ga tabbatacciyar makomar Sin mai kyau bisa dorewar manufofi masu karko da gwamnatin Sin ke dauka, shi ya sa, suka yanke shawarar zurfafa zuba jari da habaka kasuwar Sin.
A watanni 2 na farkon wannan shekara, darajar manyan masana’antun kere-kere na Sin ta karu da kashi 13.1% idan aka kwatanta da shekarar da ta gabata. Wannan tsarin ci gaba mai dogara da kirkire-kirkire, ba wai kawai ya inganta yiwa tsarin tattalin arzikin Sin kwaskwarima ba ne, har ma ya ba da damar yin hadin gwiwar inganta masana’antu na kasashen duniya.
Duk da yadda manufar kariyar cinikayya ke kara kunnon kai, cinikayyar shige da fice ta Sin a wadannan lokuta ta karu da kashi 18.3% duba da matsin lamba da ta fuskanta. Tun farkon wannan shekara, manyan jami’an kasashen duniya da kamfanonin kasashen waje sun ziyarci Sin bi da bi, kuma babban jari na kasa da kasa yana kara zuwa nan Sin, saboda dukkan bangarorin sun gane cewa, tafiya tare da Sin, tafiya ce tare da damamaki, kuma zuba jari a Sin ya kasance tamkar ake zuba jari ne a gaba.
Ci gaban da Sin take samu a farkon wannan shekara, ya karawa duniya fahimtar halin da kasar take ciki: wato tana samun ci gaba ba tare da tangarda ba a sabuwar shekara, da karfin samun ci gaba bisa kwaskwarima da take yi. Kazalika, tana da karfin juriya ta fuskantar kalubaloli da hadarori, da kuma kyakkyawan fata na kara bude kofa. Nan gaba, yayin da ake kokarin tabbatar da ayyukan shirin karo na 15, Sin za ta ci gaba da samun ingantaccen yanayin ci gaba, da kawowa duk fadin duniya karin fa’idodin Sin. (Amina Xu)
