A yau Litinin, kakakin ma’aikatar harkokin wajen Sin Mao Ning, ta gudanar da taron manema labarai na yau da kullum. Inda a gun taron, ta gabatar da wasu bayanai game shirin kasar Sin na tura manzon musamman, da wakilin musamman don ziyartar kasashe dake Gabas ta Tsakiya musamman yankunan Gulf da na Bahar Maliya, da kuma Kahon Afirka.
Mao ta bayyana cewa, wakilin musamman na gwamnatin Sin kan harkokin Afirka zai ziyarci kasashen Habasha, da Djibouti, da Masar a farko zuwa tsakiyar watan nan na Nuwamba, yayin da wakilin musamman na Sin kan harkokin yankin Kahon Afirka zai ziyarci kasar Eritrea a farkon watan na Nuwamba.
Jami’ar ta ce wadannan ziyarce-ziyarce na da nufin inganta zaman lafiya da tattaunawa, da rage tashin hankali, da kuma taka rawa mai amfani wajen kiyaye zaman lafiya da kwanciyar hankali a yankunan.
Bugu da kari, dangane da ziyarar da shugaban kasar Gabon, Brice Clotaire Oligui Nguema, zai gudanar a kasar Sin nan ba da jimawa ba, Mao Ning ta bayyana cewa, Sin na fatan yin aiki tare da Gabon, bisa damar wannan ziyara don daukaka dangantakar dake tsakanin kasashen biyu zuwa wani sabon mataki, tare da bayar da karin gudummawa wajen gina kyakkyawar makoma ta bai-daya ta Sin da Afirka a sabon zamani.
Game da amincewar da kwamitin kwance damara da tsaron duniya na MDD ya yi, kan wani kuduri mai taken “Inganta amfani da hadin gwiwar kasa da kasa ta hanyar zaman lafiya a fagen tsaron kasa da kasa”, wanda Sin ta gabatar a babban taron MDD karo na 81, Mao Ning ta bayyana cewa, aiwatar da wannan kuduri wani muhimmin bangare ne na kokarin Sin kan aiwatar da shawarwarin tsaron duniya.
Mao Ning ta kuma sanar da cewa, mamba a ofishin siyasa na kwamitin kolin jam’iyyar kwaminis ta Sin, kuma ministan harkokin wajen kasar Wang Yi, zai karbi bakuncin taron ministocin harkokin waje karo na 11 na hadin gwiwar Lancang-Mekong a birnin Beijing, daga gobe Talata 3 zuwa Laraba 4 ga watan nan na Nuwamba. (Safiyah Ma)
