Fadar Shugaban Ƙasa da Gwamnan Jihar Oyo, Seyi Makinde, sun shiga wata zazzafar taƙaddama a ranar Lahadi, 18 ga watan Oktoba, 2026, kan batun ribar kamfanin iskar gas na Nijeriya (NLNG) da ta kai Naira biliyan 250, wadda gwamnan ya yi zargin ba a sanya ta a cikin asusun rabon arziƙi na ƙasa (FAAC) domin amfanin jihohi ba.
Makinde ya buƙaci Gwamnatin Tarayya da ta yi cikakken bayani kan inda kuɗaɗen suka maƙale, yana mai nuni da cewa rashin raba kason ga jihohi da ƙananan hukumomi ya saɓa wa ƙa’idar gaskiya da adalci a daidai lokacin da al’umma ke fuskantar tsananin matsin tattalin arziƙi.
Da take mayar da martani, Fadar Shugaban Ƙasa ta zargi gwamnan da son tada jijiyoyin wuya da sanya siyasa cikin batun kuɗaɗen shigar ƙasa, tana mai jaddada cewa dukkan kuɗaɗen shiga na bin ƙa’idojin asusun tarayya kamar yadda doka ta tanada. Gwamnatin ta kuma ƙalubalanci Makinde da ya mayar da hankali kan yadda yake tafiyar da maƙudan kuɗaɗen da Jihar Oyo ke karɓa a kowane wata a maimakon neman ɓata sunan gwamnatin tarayya.
Wannan sabon rikici ya sake fito da ƙalubalen da ke tattare da raba kuɗaɗen shigar ƙasa a tsakanin matakan gwamnati a Nijeriya, musamman yayin da jihohi ke neman ƙarin kuɗi domin biyan sabon mafi ƙarancin albashi da magance tsadar rayuwa.
Masana harkokin kuɗi sun buƙaci FAAC da ta fayyace dukkan alƙaluman kuɗaɗen shiga a fili domin kauce wa jita-jita da kuma ƙara amincin ƴan ƙasa ga tsarin tafiyar da dukiyar ƙasa.
