Ko ta yaya dandalin tattalin arzikin duniya na lokacin zafi na bana wato DAVOS ya bambanta da saura? Tsarin “amfani da kirkire-kirkire a mabambantan bangarori” ya zama mabudin tattaunawa. Kuma Sin, ita ce wurin aiwatar da wannan tsari mai kyau a duniya. Daga ranar 23 zuwa 25 ga watan, baki sama da 1700 daga kasashe da yankuna sama da 90 sun tattara a birnin Dalian dake arewa maso gabashin Sin, don tattaunawa kan wannan jigo a taron DAVOS, tare da tsayar da sabon tafarkin hadin gwiwar kirkire-kirkire na fasaha a duniya.
A jawabinsa na bikin bude taron, firaministan Sin Li Qiang ya yi nuni da cewa kirkire-kirkire su ne mabudin samun ingantacciyar bunkasar tattalin arzikin a dogon lokaci, kuma Sin tana ba da karin “fa’idodin kirkire-kirkire” ga duniya, ta hanyar ci gaban fasaha da inganta masana’antu. Ta hanyar wannan taron, duniya ta karbi wata alama mai nuna yadda Sin ke raba “karin damarta” mai karko ta kirkire-kirkire tare da sauran sassan duniya.
Ga kamfanonin kasashe daban-daban, “karin damar Sin” tana bayyana a bangaren karfafa kirkire-kirkire a mabambantan bangarori, da kuma damar zuba jari mai girma. Ga ci gaban duniya kuwa, wannan damar ta bayyana a fannin samun sabbin fasahohi mafi sauki, da kuma raba sakamako mai fa’ida ga kowa. Sin ta dage a kan bude kasuwar kirkire-kirkire ga ketare, ta yadda karin kasashe musamman kasashe masu tasowa, za su iya yin amfani da sabbin fasahohi, da kayayyaki masu rahusa, wanda hakan ke taimaka musu wajen magance matsalolin ci gaba a duniya.
Sin za ta kawar da shinge ta hanyar bude kofarta ga ketare, da karfafa karfinta a bangarori daban-daban, ta yadda za ta fitar da fasahohi na zamani daga dakin gwaje-gwaje zuwa duniya, bisa fa’idodin kirkire-kirkirenta. Abin dake shaida cewa, kirkire-kirkiren Sin ba tashin hankali ba ne ga duniya, maimakon haka dama ce ga kowa da kowa. (Amina Xu)
