Farashin ɗanyen mai ya faɗi zuwa mafi ƙaranci cikin watanni uku bayan Amurka da Iran sun cimma yarjejeniya ta farko domin kawo ƙarshen rikici da kuma sake buɗe mashigar jiragen ruwa ta Hormuz.
Rahotanni sun nuna cewa zuwa ƙarfe 06:30 agogon GMT, farashin ɗanyen mai ya sauka da dala 3.65 zuwa dala 83.68 kan kowacce ganga, wannan shi ne mafi ƙarancin farashin da aka gani tun ranar 10 ga Maris.
A cewar Donald Trump, za a sake buɗe mashigar Hormuz ba tare da biyan kuɗin wucewa ba, yayin da Iran ta ce ana sa ran buɗe hanyar cikin kwanaki 30 ƙarƙashin kulawarta. Masana sun ce wannan ya rage fargabar tangarɗar samar da mai da ta sa farashi ya tashi a watannin baya.
Masu nazarin kasuwa sun ce yanzu hankalin duniya ya koma kan yadda ƙasashen Gabas ta Tsakiya za su dawo da samar da mai da kuma ko jigilar kaya za ta koma yadda take kafin rikicin, domin Hormuz na ɗaukar kusan kashi 20% cikin 100% na jigilar mai da LNG a duniya.
