Hukumar Ƙwallon Ƙafa ta Duniya (FIFA) ta dakatar da aiwatar da hukuncin hana ɗan wasan gaban tawagar ƙwallon ƙafa ta Amurka, Folarin Balogun, buga wasa na tsawon shekara ɗaya. Hakan ya ba shi damar ci gaba da wakiltar ƙasarsa a Gasar Kofin Duniya da ake ci gaba da gudanarwa.
A cikin wata sanarwa, FIFA ta bayyana cewa an ɗauki matakin ne bisa tanadin sashi na 27 na Dokar Ladabtarwa ta FIFA, wanda ke bai wa ɗan wasa damar ci gaba da taka leda yayin da ake sauraron ƙarar da ta shafe shi. Hukumar ta ce an dakatar da aiwatar da hukuncin har sai an kammala shari’ar.
Sai dai FIFA ta gargaɗi cewa idan Balogun ya sake aikata irin wannan laifi cikin shekara guda, za a soke dakatarwar da aka yi wa hukuncin, sannan a aiwatar da shi ba tare da la’akari da duk wani sabon hukunci da sabon laifin zai iya haifarwa ba.
Matakin na nufin Balogun zai ci gaba da kasancewa cikin tawagar Amurka a sauran wasannin Gasar Kofin Duniya, yayin da ake jiran hukuncin ƙarshe kan shari’ar da ake yi masa.
