Hukumar kwallon kafa ta Duniya FIFA, ta karrama wasu gwarazan ‘yanwasa biyar da suka yi fice a gasar Kofin Duniya ta 2026 da aka kammala a ranar Lahadin da ta gabata.
A kowace Gasar Kofin Duniya da FIFA ke shiryawa takan lura da wasu ‘yanwasan da suka fi fice a fannoni daban-daban domin karrama su kan rawan da suka taka a gasar.
Sifaniya ce ta lashe kofin bayan doke Argentina – wadda ta dauka a 2022 – da ci 1-0 a wani wasa da ya dauki hankalin masoya kwallon kafa a fadin duniya. Karo na biyu kenan da Spain ke daukar kofin bayan wanda ta dauka a gasar 2010 da aka gudanar a kasar Afirka ta Kudu.
‘Yan wasa biyar da FIFA ta karrama bayan kammala gasar Kofin Duniyar su ne:
RODRI
Dan wasan tsakiya na Sifaniya ya lashe kyautar Golden Ball, wadda ake bai wa gwarzon dan wasa a gasar baki daya. Kyaftin din tawagar Sifaniyan ya kasance jigon tsakiyar fili, inda ya taimaka wa kasarsa wajen sarrafa wasanni da kuma kaiwa ga lashe kofin duniya ba tare da rashin nasara ba.
Dan wasan tsakiyar na Manchester City ya kware wajen sarrafawa da rarraba kwallo a tsakiyar fili. Rawar da ya taka ta sa aka dauke shi a matsayin mafi tasiri a gasar.
MBAPPE
Kylian Mbappé na Faransa ne ya lashe kyautar danwasan da ya fi zura kwallo a raga, wadda ake kira ‘Golden Boot’ da FIFA ke bayarwa. Dan wasan gaban na Real Madrid ya zura kwallo 10 a gasar, inda ya kare a gaban Messi na Agentina mai takwas. Banda bajintar zura kwallaye a gasar 2026, Mbappé ya kafa tarihin danwasan da ya fi zura kwallaye a tarihin gasar Kofin Duniya, inda ya ci 22.
Duk da cewa Faransa ba ta kai wasan karshe ba, Mbappé ya nuna bajinta wajen cin kwallaye a kusan kowane mataki na gasar.
UNAI SIMÓN (SIFANIYA)
Unai Simón mai tsaron ragar Sifaniya ne ya lashe kyautar Safar Zinare ta mai tsaron raga mafi kwazo a gasar Kofin Duniya ta 2026. Simón ya taka muhimmiyar rawa wajen taimaka wa Spain, inda ya yi wasanni bakwai ba tare da kwallo ta shiga ragarsa ba.
Kuma a duka tsawon gasar sau daya ne kawai kwallo ta shiga ragarsa.
PAU CUBARSÍ (SIFANIYA)
Pau Cubarsí na Sifaniya ne ya lashe kyautar matashin danwasan mafi kwazo a gasar.
Mai tsaron bayan ya nuna jajircewa wajen tsaron bayan Sifaniya a daukacin gasar, inda ya buga duka wasannin kasar takwas a gasar. Dan wasan mai shekara 19, da ke buga wasa a kungiyar kwallon kafa ta Barcelona ya haska sosai duk da karancin shekarunsa a gasar.
NETHERLANDS
Kyauta ta karshe ita ce wadda aka bai wa Netherlands a matsayin wadda ta fi nuna kyawawan dabi’u a gasar. FIFA ta ce Netherlands ta nuna kyakkyawar dabi’a da ladabi da mutunta dokokin wasa a tsawon gasar. Bayanai sun ce katin gargadi uku kawai aka bai wa tawagar, yayin da ba ta yi wani laifin da ya cancanci katin kora ba.
Duka katin gargadin uku na Netherlands ta same ne a wasan farko da ta buga da Japan. Bayan haka ba ta kara samun katin gargadi ba a duka sauran wasannin nata, har zuwa lokacin da Moroko ta fitar da ita a matakin ‘yan 32.
