Firaministan kasar Guinea, Amadou Oury Bah, ya yi hira da wata wakiliyar kafar yada labarai ta CMG a kwanan baya, inda ya nuna yabo kan dimbin shawarwari na inganta al’amuran duniya da kasar Sin ta gabatar, ciki har da shawarar “Ziri Daya da Hanya Daya”.
Kana babban jami’in ya ce, ya kamata kasashe daban daban su nuna himma da basira, don amfani da damammakin da shawarwarin kasar Sin suka haifar.A hirar da wakiliyar CMG dai, Mista Amadou Oury Bah ya ambaci sakamakon da aka samu, ta hanyar aiwatar da shawarar “Ziri Daya da Hanya Daya” a kasar Guinea. Ya ce, wanda ya fi muhimmanci daga cikinsu shi ne aikin raya mahakar karfe ta Simandou da ake aiwatar da shi, wanda ya riga ya zama wani muhimmin aikin dake kawo sauyawar salon tattalin arziki na kasar Guinea.
Ban da haka, Amadou Bah ya ce, yana fatan ganin karuwar zurfafa huldar hadin gwiwa tsakanin kasarsa da kasar Sin. Ta haka, za a iya amfani da dimbin sabbin damammakin da aka samu daga cikin huldar, don raya tattalin arzikin kasar Guinea, da karfafa cudanya tsakaninta da sauran sassan duniya, musamman ta hanyar gina wani ingantaccen tsarin jigilar kayayyaki.
Daga bisani, za a samu damar sauya salon tattalin arziki na Guinea, da na wasu yankunan dake nahiyar Afirka.Haka zalika, yayin da firaminista Amadou ya waiwayi abubuwan da ya gani a kasar Sin a kwanakin nan, ya ce, ci gaban kasar ta Sin bai shafi yunkurin raya masana’antu kawai ba, har ma ya shafi burin kyautata muhallin halittu. A cewarsa, misalin da kasar Sin ta bayar ya nuna cewa, ba dole ne aikin raya masana’antu ya haddasa gurbacewar muhalli ba.
A hakika, ana iya samun daidaito tsakanin bangarorin 2. A duk wata kasa, ya kamata a raya harkar masana’antu, da kare muhallin halittu, gami da kyautata muhallin zama na dan Adam a lokaci guda, don tabbatar da cewa jama’a za su ji dadin rayuwarsu. (Bello Wang)
