Wani rikici ya barke a taron masu ruwa da tsaki na jam’iyyar APC na Arewa maso Gabas da aka gudanar a jihar Gombe, bayan da Mataimakin Shugaban APC na Kasa daga yankin, Comrade Mustapha Salihu, ya amince da Shugaba Bola Ahmed Tinubu don yin takarar wa’adi na biyu ba tare da ambato mataimakinsa ba, Mataimakin Shugaban kasa Kashim Shettima ba.
Taron ya samu halartar ministoci, gwamnonin jihohi, da ‘yan majalisar dokoki na jam’iyyar daga yankin. Shugaban jam’iyyar na kasa, Abdullahi Ganduje, ya jagoranci wasu manyan jiga-jigan jam’iyyar zuwa taron.
- Gwamnan Kano Ya Ceto Dalibai 84 Da Ganduje Yaki Biya Wa Kudin Makaranta A Cyprus
- Za A Watsa Shirin “Bayanan Magabata Dake Jan Hankalin Xi Jinping” A Kafofin Watsa Shirye-shiryen Kasashen Tsakiyar Asiya Biyar
Bayan Salihu ya kammala jawabinsa inda ya mara wa Tinubu baya don ya tsaya takara kai tsaye, sai wasu mahalarta suka fusata hayaniya ta barke daga cikin mahalarta taron. Wasu sun fara zagin sa tare da barazanar kai masa hari, inda jami’an tsaro suka yi gaggawar fitar da shi daga dakin taron.
Daily Trust ta rawaito cewa, don kwantar da hankali, Mataimakin Shugaban Jam’iyyar na Kasa, Bukar Dalori, ya fito ya mara wa Tinubu da Shettima baki daya baya don wa’adi na biyu. Sai dai lamarin ya kara rikicewa bayan Ganduje shima ya kammala jawabi ba tare da ambato sunan Shettima ba. Wannan ya sa aka rufe taron cikin gaggawa, yayin da jami’an tsaro suka fitar da Ganduje daga wurin.
Wannan na sake nuna cewa ba lallai Tinubu ya sake takara ta Shettima a matsayin mataimaki ba, wanda kuma hakan zai iya sa wa a samu babbar baraka a cikin jam’iyyar, amma wannan mai sauki ne a wurin manyan jami’an APC domin ana cewa ana su lissafin Shettima ba shi da wani nauyi a siyasance.
