Da safiyar yau Alhamis ne wutar gobara ta tashi a wani sashin cocin Dodds Methodist Church Cathedral tare da lalata kadarorin da suka zarce na miliyan 10 a Uzuakoli da ke kusa da Umuahia a jihar Abia.
Da ya ke ganawa da LEADERSHIP a inda lamarin ya faru, Jakadan cocin, Rabaran Anyanwu James Alozie, ya nuna godiyarsu ga Allah bisa yadda ya taimakesu tare da kawo dauki cikin lamarin da har ba a samu mutuwa ba.
Ya roki masu hannu da shi da su taimaka wajen maido da abubuwan da aka yi asararsu.
Malamin ya kuma gode wa jama’a a bisa yadda suka fito suka tayasu kashe gobarar lokacin da take ci.
Shi kuma a bangarensa, Rt Rev Chibuikem Johnson ya ce wutar ta lalata kadarorin da suka hada da kwamfutoci, injuna da wasu muhimman takardu hadi da wasu abubuwan.
