Kamfanin Smintin Dangote, babban kamfanin samar da siminti a Afirka, ya kara kaimi wajen inganta tsaron hanya ta fannin karfafa matakan wayar da kan direbobi, kwarewarsu da kuma bin ka’idojin aiki mafi inganci a dukkan ayyukansa da ke fadin Afirka.
Da yake magana a taron horar da direbobi kan tsaro na shekarar 2026, wanda aka gudanar a masana’antar Kamfanin Smintin Dangote da ke Obajana, Jihar Kogi, Manajan Darakta na Rukunin Kamfanin Smintin Dangote, Mista Arbind Pathak, ya ce dole ne direbobi su rika “Tunanin Tsaro da Aiki Cikin Kiyayewa” a dukkan ayyukan kamfanin da ke Afirka.
Ya sake jaddada kudirin kamfanin na tabbatar da tsaro da walwalar direbobinsa, inda ya bukace su da su ba da fifiko ga tuki cikin aminci tare da tabbatar da cewa sun koma gida lafiya bayan kowace tafiya.
A cewarsa, Kamfanin Smintin na Dangote, a matsayinsa na babban kamfanin samar da siminti a Nijeriya da Afirka, yana ba da muhimmanci sosai ga ingancin kayayyakinsa, yayin da direbobinsa ke taka muhimmiyar rawa wajen tabbatar da cewa kayayyakin sun isa ga abokan ciniki cikin aminci da inganci.
Pathak ya jaddada cewa babu wani aikin kai kaya na kasuwanci da ya kai darajar rasa ran dan ‘Adam, yana mai bayyana cewa tsaron direbobi ya fi muhimmanci fiye da manufofin gudanar da aiki da kuma la’akari da kasuwanci.
Taron, wanda aka gudanar karkashin taken “Tunanin Tsaro, Aiki Cikin Tsaro,” ya hada direbobi, ma’aikatan sufuri da wakilan gudanarwar kamfanin domin inganta tuki cikin daukar nauyi, tattauna matsalolin walwala da kuma karfafa al’adun tsaro a dukkan ayyukan sufuri na kamfanin.
Da yake jawabi ga mahalarta, Pathak ya tunatar da direbobin cewa su ne wakilan kamfanin Dangote a manyan hanyoyin kasar, kuma suna da alhakin kare rayukansu da na sauran masu amfani da hanya.
“Duk lokacin da kuka hau bayan sitiyari, ba kaya kawai kuke dauke da su ba. Kuna dauke da martabar wannan kamfani, amincewar sauran masu amfani da hanya, kuma mafi muhimmanci, rayuwarku.
“Za mu iya maye gurbin babbar mota; amma ba za mu iya maye gurbin dan’Adam ba,” in ji shi.
Ya tabbatar wa direbobin cewa kamfanin zai ci gaba da sanya jari a shirye-shiryen da aka tsara domin inganta walwalarsu, habaka kwarewarsu ta sana’a da kuma inganta ayyukan sufuri cikin aminci.
A cewarsa, direbobi na da muhimmiyar rawa wajen ci gaban kamfanin da tsarin rarraba kayayyaki, wanda hakan ya sa tsaro da walwalarsu suka zama abubuwan da kamfanin ke ba da fifiko.
“Mun yaba da sadaukarwar da kuke yi a kowace rana domin tabbatar da ci gaba da ayyukan kasuwancinmu. Wannan ne ya sa muka kuduri aniyar ba ku kayan aiki da horon da za su taimaka muku wajen aiki cikin aminci, tare da sauraron damuwarku da inganta walwalarku.
“Idan direbobinmu suna cikin aminci, ayyukanmu za su fi karfi, al’ummominmu kuma za su fi kasancewa cikin tsaro,” in ji Pathak.
Ya bukaci direbobin da su guji wuce gona da iri wajen gudu, gajiya da sauran halayen tuki masu hadari, yana mai jaddada cewa ya kamata a auna kwarewar direba ta hanyar isa wurin da ake nufi cikin aminci, ba ta hanyar saurin kammala tafiya ba.
Shugaban Kamfanin Smintin Dangote ya shawarci direbobin da su rika tsayawa su huta duk lokacin da suka ji gajiya, tare da guje wa daukar hadarin da ba dole ba a kan hanya.
“Ina son kowane direba ya tuna da wata muhimmiyar ka’ida: idan ka gaji, ka tsaya ka huta. Idan wani yanayi ya bayyana ba shi da aminci, kada ka yi gangancin daukar hadari.
“Manufar ba wai kawai ka isa inda za ka je ba ce; manufar ita ce ka koma gida lafiya ga iyalinka,” a cewarsa.
Shugaban Sufuri na Kamfanin Smintin Dangote, Murilo Silba, yayin da yake jawabi ga direbobin, ya gargade su kan tukin ganganci, tukin da wani ke yi a madadin direban da aka ba shi aiki da sauran ayyukan sufuri marasa aminci, yana mai cewa ba za a lamunci irin wadannan halaye ba.
Silba ya bukaci direbobin da su dauki alhakin ayyukansu da kansu, tare da bayar da gudummawa wajen tabbatar da cewa hanyoyin Nijeriya sun fi aminci ga masu motoci da sauran masu amfani da hanya.
