Gwamnan Jihar Bauchi, Sanata Bala Mohammed, ya tabbatar wa sarakunan gargajiya cewa shirin gwamnati na ƙirƙirar sabbin masarautu, ba shi da nufin rage musu iko ko kuma raunana tsarin sarautar gargajiya.
Yayin da yake karɓar rahoton kwamitin da ke kula da aikin, Gwamna Bala ya ce wannan gyara na cikin shirinsa na inganta mulki a ƙananan matakai, rufe wuraren da babu tsari, da kuma bunƙasa ci gaban al’umma a faɗin jihar.
- Kotu Ta Aike Da Ɗan TikTok Gidan Gyaran Hali Kan Bidiyon Batsa A Kano
- Yanzu-Yanzu: Kwara United Ta Sallami Kocinta, Tunde Sanni
Kwamitin ya ba da shawarar kafa sabbin masarautu 13, sarakuna biyu, da yankuna 111 a Jihar Bauchi.
Gwamna Bala ya bayyana cewa wannan shiri na cikin alƙawuran da ya yi a lokacin yaƙin neman zaɓen 2019, domin kusantar da gwamnati ga jama’a da kuma ƙara wa sarakunan gargajiya damar taka muhimmiyar rawa wajen wanzar da zaman lafiya da haɗin kai.
Ya amince cewa wasu sarakuna na iya nuna damuwa game da wannan sauyi, amma ya ce irin wannan gyara ya riga ya samu nasara a wasu jihohi.
A cewarsa, gyaran yana taimakawa wajen samun bayanai daidai domin tsara ci gaba da kuma rarraba albarkatun ƙasa bisa adalci daga gwamnatin tarayya.
“Wannan tsarin yana daidai da yadda ake yi a wasu jihohi, inda ake amfani da bayanan masarautu, yankuna da ƙauyuka wajen tsara ci gaba da rarraba kuɗaɗe,” in ji shi.
Gwamnan ya jaddada muhimmancin sarakunan gargajiya wajen haɗa kan jama’a da tallafa wa ayyukan ci gaba, tare da tabbatar da cewa za a aiwatar da sabon tsarin cikin gaskiya.
Ya yaba wa kwamitin bisa jajircewarsu da yadda suka gudanar da aikin cikin gaskiya da tsari.
Tun da farko, shugaban kwamitin, Hamza Koshe Akuyam, ya bayyana cewa sun karɓi buƙatu 196, wanda 17 don kafa sabbin masarautu, 166 don sabbin yankuna, da wasu don sabbin sarakuna.
