Gwamnatin Jihar Borno ta roƙi Gwamnatin Tarayya ƙarƙashin jagorancin Shugaba Bola Tinubu da ta ɗauki mataki cikin gaggawa kan ɗan kwangilar da aka bai wa aikin yashe madatsar ruwa ta Alo Dam da ke jihar.
Gwamnatin ta ce ko da yake an fara yashe wani ɓangare na dam ɗin, har yanzu akwai barazanar ambaliya idan ba a gama aikin ba kafin ruwa ya ƙaru.
- Mataimakin Firaministan Sin Ya Gana Da Ministar Kudin Birtaniya
- Shin Rashin Nasara Ya Rage Damar Yamal Na Ballon d’Or?
Kwamishinan yaɗa labarai da tsaro na Jihar Borno, Farfesa Umar Tar, ya bayyana wa manema labarai cewa an riga an ba da kwangilar aikin kuma har Minista ya zo ya ƙaddamar da shi.
Amma har yanzu ba a ga yan kwangilar sun dawo domin ci gaba da aikin ba.
“Yanzu damina ta fara, idan aka yi jinkiri kuma ruwan sama ya zo kamar bara, akwai hatsarin ambaliya. Ya kamata a yashe ruwan cikin gaggawa saboda yadda ya cika, idan aka yi hakan, ko ruwa ya ƙaru ba zai janyo ambaliya ba,” in ji Farfesa Tar.
A bara ne dai dam ɗin Alo ta cika da ruwa har wani ɓangare ya buɗe, lamarin da ya haddasa mummunar ambaliya a Maiduguri, inda aka rasa rayuka da dukiyoyi da dama.
