Gwamnan Jihar Kano, Abba Yusuf, ya amince da ƙarin girman ma’aikata 18,984 na Hukumar Kula da Ilimin Firamare ta Jiha (SUBEB), na watan Janairu da Yuli 2026.
Gwamnatin jihar za ta fitar da Naira miliyan 235.1 domin aiwatar da ƙarin girman ma’aikatan a hukumomin ilimi na ƙananan hukumomi 44 na jihar.
SUBEB ta ce aiwatar da ƙarin girman zai taimaka wajen ƙara wa ma’aikata ƙwarin gwiwa, inganta ci gaban aikinsu da kuma ƙarfafa ayyukan ilimin firamare.
Hukumar ta ce tana da kusan ma’aikata 60,000 da ke aiki a faɗin ƙananan hukumomi 44 na jihar, kuma gwamnatin yanzu ta gaji basukan ƙarin girman ma’aikata da suka shafe shekaru.
Majalisar Zartarwa ta Jihar Kano ta tabbatar da amincewar gwamnan, lamarin da ya ba da damar sakin kuɗin da kuma fara aiwatar da ƙarin girman ma’aikatan.
