Hukumar Kare Haƙƙin Masu Sayayya ta Jihar Kano (KCPC), ta rufe wasu shaguna a Kasuwar Singa tare da kama ’yan kasuwar da ake zargi da sauya wa madarar gari da wa’adin amfani da ita ya ƙare kwanan wata domin sake sayar da ita.
Hukumar ta gudanar da samamen ne tare da haɗin gwiwar shugabannin kasuwar, bayan samun ƙorafi daga ƙungiyar ’yan kasuwar.
Mai magana da yawun hukumar, Jamilu Mustapha Yakasai, ya ce jami’ansu sun gudanar da bincike bayan samun rahoton, wanda ya kai ga kama waɗanda ake zargi da kuma rufe shagunan da abin ya shafa.
Babban Sakataren hukumar, Ibrahim Garba Muhammad, ya gargaɗi ’yan kasuwa cewa duk wanda aka samu da laifin sauya wa kayayyaki ranar ƙarewar wa’adin amfani ko sayar da jabun kaya da marasa inganci zai fuskanci hukunci a kotu.
Ya kuma yaba wa shugabannin kasuwar bisa haɗin kan da suke bai wa hukumar wajen daƙile sayar da kayayyakin da ba su da inganci da kuma kare lafiyar masu sayayya.
