Gwamnatin Jihar Sokoto ta bayyana cewa ta ƙaddamar da yaƙi da ’yan ta’adda da sauran masu aikata laifuka, biyo bayan mummunan harin da aka kai a ƙaramar hukumar Kebbe.
Gwamnatin ta kuma bayar da Naira miliyan 9 a matsayin tallafin gaggawa ga iyalan waɗanda suka mutu da kuma mutanen da suka jikkata a harin.
A ƙarƙashin umarnin Gwamna Ahmad Aliyu Sokoto, wata tawaga ƙarƙashin jagorancin Kwamishinan Harkokin Addini, Farfesa Jabir Sani Maihulla, ta ziyarci al’ummomin da abin ya shafa domin jajanta wa iyalan mamatan tare da kai musu tallafi.
An bai wa iyalan mutane takwas da suka mutu Naira miliyan 8, wato Naira miliyan ɗaya ga kowane gida, tare da buhunan kayan abinci biyar.
Haka kuma, mutane huɗu da suka jikkata sun samu Naira miliyan ɗaya, wato Naira 250,000 kowannensu, da kuma buhunan shinkafa, gero da masara.
Maihulla ya bayyana harin a matsayin mummunan hari da ya jefa iyalan waɗanda abin ya shafa da al’ummar Kebbe cikin babban tashin hankali, yana mai tabbatar da cewa gwamnati ba za ta yi watsi da al’ummomin da hare-haren ta’addanci suka shafa ba.
