Hukumar Hana Sha da Fataucin Miyagun Kwayoyi ta Nijeriya (NDLEA) ta kama wata tankar mai, mai ɗaukar lita 20,000, maƙare da kilo 2,145 na tabar wiwi da aka ɓoye a cikin tankar.
Tankar mai lamba MKA 960 XC an kama ta ne a kan titin Akoko zuwa Lokoja a Jihar Ondo, ranar Juma’a, 4 ga Satumba, 2026, bayan direban ya ƙi tsayawa lokacin da jami’an NDLEA suka umurce shi.
Daraktan Yaɗa Labarai na NDLEA, Femi Babafemi, ya ce direban ya bar tankar a harabar wata coci da ke Ugbe Akoko, sannan ya tsere zuwa cikin daji.
Binciken tankar ya gano wani ɓoyayyen sashe da ke ɗauke da buhuna 165 na tabar wiwi, masu nauyin kilo 2,145, waɗanda aka ɓoye tare da man da za a kai Jos a Jihar Filato.
NDLEA ta ce tankar ta yi ƙaurin suna wajen tsallake bincike a lokutan baya, don haka kama ta na daga cikin manyan nasarorin hukumar wajen dakile hanyoyin safarar miyagun kwayoyi.
