Kungiyar cinikayya ta duniya ta gudanar da jerin tarukan tattaunawa kan hanyoyin bunkasa ci gaban kasa, daga ranar 26 zuwa 27 ga watan da muke ciki a birnin Geneva da ke kasar Switzerland.
A yayin tarukan, Sin da Gambia sun gudanar da taron karawa juna sani da musayar kwarewa kan yadda za a dunkule harkokin cinikayya da zuba jari domin tallafawa ayyukan habaka masana’antu a Afrika, wanda ya samu yabawa sosai daga manyan kasashe da suka ci gaba da masu tasowa mambobin kungiyar WTO.
Kazalika taron ya samu halartar wakilai daga cibiyar bunkasa tsarin tattalin arziki dake jami’ar Peking ta kasar Sin, da ma’aikatar ciniki, masana’antu da ayyukan yi ta Gambiya, da kuma kamfanonin dake Rwanda da suke samun tallafin jari daga kasar Sin, inda suka tattaunawa kan yadda za a gudanar da ayyukan bunkasa harkokin masana’antu a Afrika, ta hanyar tsare-tsare dake da alaka da dunkule harkokin ciniki da zuba jari daga mahangar gwamnati, masana’antu da fannin ilmi.
A watan Yulin shekarar nan, kasar Sin ta aike da daftarin shawarwari ga kungiyar cinikayya ta duniya kan hade harkokin ciniki da zuba jari domin habaka ayyukan inganta masana’antu, wanda kasashen Afrika da dama suka rattaba hannu a kai, kuma ya samu goyon bayan mambobin kungiyar, da suka hada da Koriya ta Kudu, Switzerland, kungiyar tarayyar Turai, da kuma kungiyar kasashe da ke da karancin ci gaba. (Mai fassara: Suleiman Suleiman)
