Ministan Tsaro, Christopher Musa, ya bayyana cewa Gwamnatin Tarayya ta ƙara mafi ƙarancin albashin sojojin Nijeriya daga Naira 49,000 zuwa Naira 100,000 a kowane wata, a wani yunƙuri na inganta jin daɗin jami’an rundunar soji.
Musa ya bayyana hakan ne yayin wata hira da ya yi da News Central a ranar Laraba, gabanin shirin NC Exclusive da aka tsara za a watsa a ranar Juma’a.
Duk da ƙarin albashin, ministan ya amince cewa har yanzu rundunar sojin Nijeriya na fama da ƙarancin kuɗaɗen gudanar da ayyuka, yana mai cewa kasafin kuɗin da ake ware wa fannin tsaro bai isa ya biya dukkan buƙatun rundunar ba.
Da aka tambaye shi ko kasafin kuɗin da ake da shi ya wadatar, sai ya amsa da cewa, “bai isa ba.”
Da yake bayani kan matakan da gwamnati ke ɗauka domin inganta walwalar sojoji masu ƙaramin matsayi, Musa ya ce, “a baya, soja yana karɓar Naira 49,000 a wata. Mun yi ƙoƙari sosai, yanzu yana karɓar Naira 100,000 a wata.”
