A ’yan shekarun baya bayan nan, duniya na ta ganin karin karbuwar motoci masu aiki da lantarki kirar kasar ko EVs, inda kasuwar irin wadannan motocin fasinja da ake kerawa a kasar Sin ta haura na kamfanonin kirar motoci na kasar Japan a sassa daban daban na duniya.
Wasu alkaluma sun nuna yadda a watan Mayun bana, a karon farko a tarihi sabbin motocin EVs kirar kasar Sin suka mamaye kasuwannin Turai, tare da zarce takwarorinsu na Japan.
Alkaluman sun kuma nuna yadda manyan kamfanoni kirar motoci na farko a tarihin kasar Sin guda biyar, suka sayar da jimillar motoci 138,410 a kasashen Turai 31 a watan na Mayu, adadin da ya karu da kaso 65 bisa dari a mizanin shekara-shekara, yayin da takwarorinsu na Japan guda 6 suka sayar da jimillar motoci 130,424, wanda hakan ke nuna raguwar cinikinsu da kaso 3 bisa dari kan na shekarar bara.
Tabbas wannan sabon ci gaba ya ja hankali, ya kuma haifar da tambayar cewa, shin ko me ya sa motoci samfurin EVs kirar kasar Sin suka cimma wannan gagarumar nasara? Amsar ba mai wahala ba ce. Hakan sakamako ne na fifikon fasahohi, da ikon gogayya da kamfanonin kirar motoci na Sin ke da su. Bayan kwashe gomman shekaru ana zuba jari, da gudanar da bincike da gwaje-gwaje, Sin ta gina tsari mai na-garta, da fifiko a manyan fannonin kirar motoci samfurin EVs, musamman fannin kirar batura masu inganci, da na’urorin sarrafa injuna, da fannin kere-keren sauran sassan da ake bukata don hada motocin.
Yayin da fasahohi suka hadu da karfin sarrafa hajoji, aka kuma samu damar rage farashin kaya masu karko, tabbas masu sayayya za su rungumi kasuwar da ta samar da wannan rangwame. Ma iya cewa duk da kalubale da motocin lantarki kirar kasar Sin ke fuskanta a kasuwannin waje, ciki har da karin haraji a wasu sassa, da shingen cinikayya, hakan bai hana su samun karin karbuwa.
Kuma baya ga na-garta, karko, saukin farashi da suke baiwa masu sayayya, motocin kirar EVs na kasar Sin suna kuma bayar da muhimmiyar gudunmawa ga batun rage fitar da hayaki mai dumama yanayi. Kuma hakan babbar gudunmawa ce ga duniya, musamman ma a wannan gaba da duniya ke dandana kudarta, bisa yanayin zafi dake karuwa sanadiyyar mummunan tasirin sauyin yanayi. (Saminu Alhassan)
