Erling Haaland ya karya tarihin Alan Shearer ta hanyar zama dan wasan da yafi saurin cimma nasarar zura kwallaye 100 a gasar Firimiya fiye da kowa a tarihin gasar, inda ya kafa wannan tarihin a wasan da Manchester City ta doke Fulham da ci 5-4 a ranar Talata.
Dan wasan Norway mai shekaru 25, zuwa yanzu ya zura kwallaye 20 a wasanni 19 da ya bugawa Manchester City a dukkan gasa, Haaland ya shigo wasan na Fulham bayan buga wasanni uku a jere ba tareda ya zura kwallo ko daya ba, Haaland bai jefa kwallo ba a rashin nasara da Newcastle da Bayer Leverkusen sai kuma nasarar da suka samu a kan Leeds a karshen mako.
Erling Haaland ya rubuta sunansa a cikin littafin tarihin kwallon kafa na Ingila bayan ya karya tarihin zama dan wasa mafi sauri da ya ci kwallaye 100 a gasar Firimiya, dan wasan gaban Norway Haaland ya zama dan wasa na 35 da ya cimma wannan nasarar kuma na farko tun bayan Heung-Min Son a shekarar 2023, ya kuma share tarihin Alan Shearer wanda ya tsawon shekaru 30.
Tun lokacin da ya fara buga gasar Firimiya a kakar wasan 2022/23, Haaland ya zura kwallaye 10 a wasanni 6 na farko, Haaland ya zama dan wasa mafi sauri a tarihi da ya ci kwallaye 50 a gasar Firimiya, ” Ina alfahari da wannan tarihin kuma ina fatan cigaba da taimakawa Manchester City ta hanyar zura kwallaye masu muhimmanci” Haaland ya fadawa yan jarida bayan kammala wasan.
