Rahotanni daga ma’aikatar harkokin wajen kasar Sin sun bayyana cewa, wakili na musamman na shugaban kasar Sin Xi Jinping, kana mataimakin shugaban kasar, Han Zheng, zai tafi kasar Turkiye daga ranar 6 zuwa 12 ga watan nan, don halartar zaman shugabanni na Antalya na babban taro karo na 31 na kasashen da suka rattaba hannu kan yarjejeniyar sauyin yanayi ta Majalisar Dinkin Duniya, tare kuma da gudanar da ziyarar aiki a kasar Georgia.
Har wa yau, mai magana da yawun ma’aikatar harkokin wajen Sin, Mao Ning, ta jagoranci wani taron manema labarai a yau Laraba. Game da yanayin da ake ciki a yankin Gabas ta Tsakiya da na Gulf, Mao ta bayyana cewa, kasarta tana fatan inganta tuntuba da mu’amala da Saudiyya da Iran da sauran wasu kasashen shiyyar. A cewarta, abun da ke gaban komai a halin yanzu shi ne, kauce wa sake barkewar yake-yake a Gabas ta Tsakiya, wadanda za su kawo babbar illa ga mazauna shiyyar.
Sai dai game da batun da ya shafi yadda aka ambaci fasahar AI ta kasar Sin a cikin rahoton tsaron intanet na shekara-shekara na Birtaniya, Mao Ning ta ce, Sin ta damu matuka game da yadda Birtaniya ta shafa wa Sin bakin fenti, ba tare da kwararan shaidu ba. A cewarta, irin wannan abun ba zai taimaka ko kadan ga karfafa fahimtar juna tsakanin Sin da Birtaniya ba, har ma zai bata sunan Birtaniya a bangaren hadin-gwiwar duniya kan kiyaye hatsarin amfani da fasahar AI. (Murtala Zhang)
