Rundunar Sojin Nijeriya ta ba wani soja mai suna Utim Terwase kyautar N500,000, bayan ya ƙi karɓar cin hancin da wani da ake zargi da garkuwa da mutane ya yi masa domin ya sake shi.
Majiyoyin tsaro sun ce sojan ya kama wanda ake zargin ne bayan ya yi ƙoƙarin tserewa, amma ya ƙi karɓar kuɗin da aka ba shi, sannan ya miƙa shi ga hukumomin da suka dace.
Mai magana da yawun ‘Operation Enduring Peace’, Kyaftin Polycarp Chinonso Oteh, ya tabbatar da lamarin, inda ya ce kwamandan rundunar ta 3 ta soji, Manjo-Janar Maxwell Dangana, ne ya bayar da kyautar ta hannun Kwamandan Sashe na 6, Kanal Philimon Malgwi.
Ya ce Dangana ya yaba wa sojan bisa gaskiya, ladabi da ƙwarewar aiki da ya nuna, yana mai cewa halinsa ya nuna jajircewa wajen kare ƙa’idojin aikin soja maimakon fifita son zuciya.
A cewarsa, an bayar da kyautar N500,000 ne domin girmama amincin sojan, kuma kuɗin sun yi daidai da adadin cin hancin da ya ƙi karɓa.
Kwamandan ya kuma bukaci sauran jami’an soja su yi koyi da wannan hali, tare da ci gaba da gudanar da aikinsu cikin gaskiya, ladabi da kishin ƙasa.
