Gwamnatin Tarayya ta samar da hanyar amfani da lambar USSD ta MoMo Payment Service Bank (PSB) domin ’yan Nijeriya da aka zaɓa su tantance cancantarsu da karɓar tallafin naira 50,000 na shirin National Emergency Relief and Stabilisation Intervention (NERSI).
Ma’aikatar Jinƙai da Rage Talauci ce ke kula da shirin, wanda aka ƙaddamar domin tallafa wa gidaje masu ƙaramin ƙarfi da waɗanda ke fuskantar matsin tattalin arziki.
MoMo PSB na cikin kamfanonin hada-hadar kuɗi guda biyar da Gwamnatin Tarayya ta amince su taimaka wajen rarraba kuɗaɗen tallafin. A cewar shafin shirin na NERSI, masu amfani da MoMo za su iya tantance cancantarsu tare da amincewa da karɓar kuɗin ba tare da buƙatar intanet ba.
Ga matakai shida da masu amfani da MoMo PSB za su bi domin tantance cancanta da karɓar tallafin:
1. Danna lambar USSD: Buɗe wurin kiran waya, sannan ka danna *671*0# ta amfani da lambar wayar da ka yi rajistar asusun MoMo da ita.
2. Tantance cancanta: Zaɓi zaɓin da zai ba ka damar duba ko kana cikin waɗanda suka cancanci tallafin shirin NERSI na Gwamnatin Tarayya.
3. Bi umarnin da aka nuna: Idan an zaɓe ka, bi umarnin da zai bayyana a allon wayarka.
4. Amincewa da tallafin: Tabbatar da amincewarka wajen karɓar tallafin naira 50,000.
5. Karɓar kuɗin: Bayan kammala matakan, za a kunna maka walat ɗin kuɗi na wayarka, sannan a saka kuɗin tallafin a ciki.
6. Tabbatar da shigar kuɗi: Za ka samu saƙon SMS da zai tabbatar maka cewa an tura kuɗin zuwa walat ɗinka.Waɗanne mutane ne suka cancanci tallafin?
Gwamnatin Tarayya ta bayyana cewa ana zaɓar waɗanda za su amfana ne daga bayanan rajistar ɗan ƙasa da aka tantance da kuma kundin rajistar gidaje masu buƙata. Shirin ya shafi gidaje masu ƙaramin ƙarfi da waɗanda ke cikin mawuyacin hali a dukkan shiyyoyin shida na Nijeriya.
Sai dai kasancewar mutum yana da asusun MoMo PSB ba yana nufin cewa ya cancanci tallafin kai tsaye ba. Haka kuma, babu wata hanyar neman shiga shirin da mutum zai iya bi da kansa, domin gwamnati ce ke tantance waɗanda suka cancanta, kuma ana rarraba kuɗin ne a matakai daban-daban.
Shin tallafin naira 50,000 kyauta ne?
Gwamnatin Tarayya ta ce babu buƙatar biyan kuɗin rajista, sarrafawa ko kunna asusu domin karɓar tallafin. Ta kuma gargaɗi al’umma da su guji mutanen da ke neman kuɗi da sunan taimakawa wajen karɓar tallafin.
Babu wani jami’in shirin da zai nemi lambar sirrin asusu (PIN), ko lambar tabbatarwa (OTP) ko BVN domin sakin kuɗin. Duk wanda ke da tambaya ko ƙorafi zai iya kiran layin taimakon shirin NERSI ta 0700-022-2222.
