Gwamnatin Tarayyar Nijeriya ta samar da hanyar amfani da lambar USSD ta Moniepoint Microfinance Bank domin ƴan ƙasa su tantance cancantarsu da karɓar tallafin naira 50,000 ƙarƙashin shirin National Emergency Relief and Stabilisation Intervention (NERSI).
Ma’aikatar Jin ƙai da Rage Talauci ta Tarayya ce ke jagorantar shirin, wanda aka tsara domin tallafa wa gidaje masu ƙaramin ƙarfi da ke fama da tsadar rayuwa.
Bankin Moniepoint Microfinance, wanda yake cikin kamfanonin da aka amince su taimaka wajen biyan tallafin, ya bayyana cewa kwastomominsa za su iya amfani da lambar USSD domin duba ko suna cikin waɗanda aka zaɓa. Wannan hanya za ta bai wa waɗanda suka cancanta damar amincewa da karɓar kuɗin kai tsaye cikin asusunsu na Moniepoint ba tare da zuwa reshen banki ko amfani da intanet ba.
Ga matakai huɗu da masu amfani da Moniepoint za su bi domin tantance cancanta da karɓar tallafin:
1. Danna lambar USSD: Buɗe wurin kiran waya, sannan ka danna *5573*27# ta amfani da lambar wayar da aka yi rajistar asusun Moniepoint da ita.
2. Bi umarnin da aka nuna: Bi umarnin da zai bayyana a allon wayarka domin tantance ko kana cikin waɗanda suka cancanci tallafin shirin NERSI.
3. Amincewa da karɓar kuɗin: Idan an zaɓe ka, za ka samu saƙo a allon wayarka da zai buƙaci ka amince da karɓar tallafin naira 50,000.
4. Karɓar kuɗin: Da zarar ka amince da tayin, za a tura kuɗin tallafin kai tsaye zuwa asusunka na Moniepoint.
Shin karɓar tallafin naira 50,000 kyauta ne?
A cewar bayanan da Moniepoint ya bayar, waɗanda suka cancanci tallafin za su iya karɓar kuɗin ba tare da biyan kuɗin rajista, ko sarrafawa ko kunna asusu ba. Bankin ya kuma shawarci kwastomominsa da su yi hattara da masu damfara da ke neman kuɗi ko bayanan sirrin banki da sunan taimakawa wajen sakin tallafin.
Haka kuma, kasancewar mutum yana da asusun Moniepoint ba yana nufin cewa zai karɓi tallafin kai tsaye ba, domin kuɗin an ware su ne ga waɗanda gwamnati ta zaɓa.
Shirin National Emergency Relief and Stabilisation Intervention (NERSI) wani shiri ne na Gwamnatin Tarayya da aka ƙirƙira domin rage wa ƴan Nijeriya masu ƙaramin ƙarfi raɗaɗin matsin tattalin arziƙi.
Mene ne shirin NERSI?
Shirin na daga cikin ƙoƙarin gwamnati na tallafa wa gidajen da hauhawar farashin kayayyaki da tsadar rayuwa suka fi shafa, ta hanyar ba su tallafin kuɗi kai tsaye.
Gwamnati na amfani da kamfanonin hada-hadar kuɗi da ta amince da su, ciki har da Moniepoint, domin isar da kuɗin ga waɗanda aka zaɓa.
