Gwamnatin Tarayya ta ƙaddamar da hanyar amfani da lambar USSD na kamfanin NairaGram domin bai wa waɗanda aka zaɓa damar tantance cancantarsu da karɓar tallafin kuɗi na Naira 50,000 ƙarƙashin Shirin NERSI, ba tare da buƙatar intanet ba.
Ma’aikatar Jin ƙai da Rage Talauci ta Tarayya ce ke kula da shirin, wanda aka tsara domin tallafa wa gidajen da ke cikin talauci da waɗanda hauhawar tsadar rayuwa ta shafa.
NairaGram na ɗaya daga cikin kamfanonin biyan kuɗi guda biyar da gwamnati ta amince da su wajen rarraba tallafin.
Ga matakan da masu amfani da NairaGram za su bi:
Na farko, su danna lambar *726*00# ta amfani da lambar wayar da aka yi rajista.
Na biyu, su zaɓi sashin tantance cancanta.
Na uku, su bi umarnin da tsarin zai nuna.
Na huɗu, idan an zaɓe su, su amince da karɓar tallafin.
Na biyar, za a kunna musu walat ɗin kuɗi sannan a saka Naira 50,000 a ciki.
Na shida, za su samu saƙon SMS da ke tabbatar da shigar kuɗin.
Gwamnati ta bayyana cewa za a zaɓi waɗanda za su amfana ne daga sahihan bayanan katin shaida na ƙasa da Rajistar Jama’a ta Ƙasa, musamman gidajen da ke cikin mawuyacin hali. Samun asusun NairaGram kaɗai ba ya nufin mutum ya cancanci tallafin, kuma babu wata hanyar rajista da jama’a za su bi domin shiga shirin. Ana rarraba kuɗin ne a matakai daban-daban.
Gwamnati ta jaddada cewa tallafin kyauta ne, ba a buƙatar biyan kuɗin rajista, ko ssarrafawa ko kunna walat. Ta kuma gargaɗi jama’a kada su ba kowa lambar sirrin ATM, OTP ko bayanan sirri na asusunsu. Duk wanda aka zaɓa zai iya samun ƙarin bayani ta layin taimakon shirin NERSI: 0700-022-2222.
Muhimmin bayani: Shirin ba ya buƙatar mutum ya biya kuɗi ko ya nemi wani ya saka shi cikin jerin waɗanda za su amfana. Idan ba a zaɓe ka ba, danna lambar USSD ba zai tabbatar maka da samun tallafin ba. Ana iya samun cikakkun bayanai a shafin hukuma na (NERSI)
