Ikorodu City Ta Hau Matsayi Na Uku Bayan Doke Wikki Tourists Da Ci 3-1

Ƙungiyar Ikorodu City ta samu gagarumar nasara bayan ta doke Wikki Tourists da ci 3-1 a wasan gasar Nigeria Premier Football League (NPFL) da aka buga a filin wasa na Mobolaji Johnson Arena da ke Lagos. Nasarar ta ɗaga ƙungiyar zuwa matsayi na uku a teburin gasar, tana ƙara kusantar samun gurbin buga wasannin nahiyar Afrika.

Ikorodu City ta fara wasan cikin ƙwarin gwuiwa, inda a minti na hudu Salami Farouk ya jefa ƙwallo ta farko bayan taimakon Alfred Odinaka. Daga bisani, Abayomi Ayodeji ya ƙara ta biyu a minti na 18, wadda kuma ta zama ƙwallo ta 100 a tarihin ƙungiyar a gasar NPFL.

Kafin a tafi hutun rabin lokaci, Joseph Arumala ya kara ta uku ta hannun bugun fanareti bayan an yi masa ƙeta, nan take suka samu bugun daga kai sai mai tsaron gida. Wannan ƙwallo ita ce ta 13 a kakar wasa, wanda ya kai shi zarce masu cin ƙwallaye a gasar.

A ɓangaren Wikki Tourists, Jonathan Mairiga ya rage giɓi a minti na 65, amma hakan bai wadatar ba domin dawowa wasan, yayin da tsaron Ikorodu City ya tsaya tsayin daka har aka kammala wasan.

Da wannan sakamako, Ikorodu City na matsayi na uku da maki 58, yayin da Wikki Tourists ke ci gaba da zama a matsayi na 19, suna fuskantar barazanar faɗuwa daga gasar yayin da kakar wasa ke dab da ƙarewa.

Abubakar Sulaiman

Website |  + postsBio

• Abubakar Sulaiman

  Ƴan Bindiga Sun Kashe Mutane 2, Sun Yi Garkuwa Da 30 A Kogi
• Abubakar Sulaiman

  Gwamnatina Za Ta Mayar Da Hankali Kan Buƙatun Al’ummar Nasarawa – Wadada
• Abubakar Sulaiman

  Ƴan Bindiga Sun Kai Hari Masallaci, Sun Kashe Wani Yaro A Kaduna
• Abubakar Sulaiman

  Babachir Lawal Ya Fice Daga ADC, Ya Zargi Atiku Da Murɗe Zaben Fidda Gwani