Shugaba Bola Ahmed Tinubu ya mayar da martani mai cike da zolaya ga jam’iyyar adawa ta ADC, inda ya bayyana cewa ƴan adawar sun yi zaton zai riƙa yin barci a ofis, amma sukar da suke yi masa ta zama silar da ta sa yake a farke kuma cikin ƙwazo.
Shugaban ya bayyana hakan ne a birnin Abuja a ranar Litinin, 19 ga watan Oktoba, 2026, yana mai jaddada cewa hayaniyar ƴan adawa na ƙara masa karsashin tunkarar ƙalubalen da ke gaban Nijeriya.
Wannan tsokaci na Shugaba Tinubu na zuwa ne biyo bayan zarge-zargen da kwamitin kamfen ɗin ADC da ɗan takararta Alhaji Atiku Abubakar suka yi, inda suka soki matakinsa na rashin halartar tarukan kamfen ɗin APC a jihohi sama da 20 tare da danganta hakan da batun tsufa ko rashin ƙarfin jiki. Sai dai shugaban ya mayar da martani da cewa maimakon maganganunsu su raunana shi, sun taimaka matuƙa wajen sanya shi tsayuwa daram a kan harkokin mulki.
Shugaba Tinubu ya fayyace cewa ya gwammace ya karkatar da ƙarfinsa wajen aiki dare da rana a ofis domin daidaita fannin tattalin arziƙi da rage raɗaɗin da al’umma ke ciki, maimakon ɓata lokaci a filayen gangami yaƙin neman zaɓe yana rera waƙoƙin siyasa. Ya jaddada cewa sauye-sauyen da gwamnatinsa ta ɗauka sun fara haifar da ɗa mai ido, kuma zafin sukar da jam’iyyun adawa ke yi masa na zama izna da ke hana gwamnatinsa yin sakaci ko ɗaukar nauyin da aka ɗora mata da wasa.
A ƙarshe, Tinubu ya buƙaci magoya bayan APC da ɗaukacin ƴan Nijeriya da su mayar da hankali kan ainihin ayyukan ci gaba yayin da ake shirin fara yaƙin neman zaɓen 2027 a Kaduna a ranar Asabar mai zuwa.
Ya tabbatar da cewa ba zai bari kalaman siyasa su ruda shi ba, yana mai jaddada aniyarsa ta ci gaba da jajircewa har sai an farfaɗo da tattalin arziƙin Nijeriya yadda ya kamata.
