An kubutar da wata lauya Barista Rukayyat Mustafa da wasu ‘yan bindiga suka yi garkuwa da ita a ranar Lahadi a Sakkwato.
Rundunar ‘yansanda tare da sojoji da ‘yan banga ne suka ceto Rukayyat a ranar Laraba tare da wasu mutane uku da aka yi garkuwa da su.
- ‘Yancin Kananan Hukumomi: Kotun Koli Ta Bai Wa Jihohi 36 Kwana 7 Su Kare Kansu
- Rikicin Masarautar Kano: Lauyoyi Da Alƙalai Sun Tozarta Ɓangaren Shari’a – Shugaban Ƙungiyar Lauyoyi
Da yake zantawa da manema labarai a hedikwatar rundunar, Kwamishinan ‘yansandan Jihar Sakkwato, CP Hayatu Kaigama ya ce, “A ranar 26/05/2024 da misalin karfe 02:30 na dare, wasu da ake zargin ‘yan bindiga ne suka kai hari a yankin Badon Runji a jihar inda suka yi garkuwa da Barista Rukayya Mustapha da wani Salim Abdulsalam.
“A ranar 29/05/2024 jami’an ’yansanda daga sashin Yabo tare da hadin gwiwar sojoji da ’yanbanga da ke aiki da rahoton sirri suka farmaki ‘yan bindigar.
“Farmakin wanda aka kai a yankin Binji, ya yi sanadin kubutar da mutane uku tare da bindige daya daga cikin ‘yan bindigar yayin da sauran suka arce da raunin bindiga” in ji CP.
