Ma’aikatar tsaro ta kasar Japan ta fitar da takardar bayani kan aikin tsaro na shekara ta 2026 a ranar Talata 4 ga watan nan. A bangon kundin bayanin, an yi zanen “Cartoon” dake bayyana “mutane masu farin ciki da birni mai kyaun gani.” Amma kuma sabanin zanen, bayanan dake kunshe cikin kundin mai shafuka 598 sun yawaita magana game da “Kalubalen tsaro daga kewayenta”, inda ana ci gaba da ayyana kasar Sin a matsayin “kalubale mafi tsanani da ba a taba gani ba”.
Kazalika, bayanan sun yi fashin baki game da manufofin gwamnatin Takaichi Sanae, na fadada rundunar sojoji da karfafa makamai, tare da jaddada karkata ga hanyar tsarin yaki, da fadada masana’antar kera makamai.
Tabbas wannan mataki ya fitar da sako a fili, cewa Japan na kara gaggauta fita daga tsarin zaman lafiya da aka tsara bayan yakin duniya na biyu, tana kuma yunkurin ciyar da manufar “sake dawowa da karfin soja” gaba.
A ranar da aka fitar da wannan kundi, kungiyoyin al’umma 32 na Japan sun aike da wasikar nuna adawa da hakan, suna neman a bi “kundin tsarin mulki na zaman lafiya”.
A nata bangaren kuwa, kasar Sin ta nuna matukar rashin jin dadi, ta mayar da martani ga bangaren Japan. Ita kuwa ma’aikatar harkokin wajen Koriya ta Kudu, ta nuna matukar rashin amincewa da abubuwan da ke cikin kundin.
Sannan kamfanin dillancin labarai na Koriya ta Arewa KCNA ma, ya ruwaito ministar kwamitin tsakiyar jam’iyyar ’yan kwadago ta Koriya ta Arewa Kim Yo-jong yana mai cewa, Japan tana hanzarta karkata zuwa kasa mai yunkurin ta da yaki.
Ana iya kara fahimta daga wannan kundi cewa, farfado da “ra’ayin fin nuna karfin soja” na Japan ya zama babbar barazana, kuma dole ne al’ummar kasa da kasa su yi taka tsan-tsan don daukar matakan da suka dace, na bayyana adawa da hakan da dakile shi.
Idan Japan ta dage kan yunkurinta na sabawa yanayin da ake ciki, wato zaman lafiya da hadin gwiwa a yankin Asiya da tekun Pasifik, to tabbar za ta girbi abin da ta shuka. (Amina Xu)
