Ma’aikatar kasuwanci ta kasar Sin, ta fitar da bayanai a jiya Juma’a, wadanda ke cewa a farkon rubu’in shekarar 2026, darajar jimillar cinikayyar shige da fice ta kasar Sin ta kai Yuan tiriliyan 1.8229, adadin da ya karu da kashi 2.3% idan aka kwatanta da shekarar da ta gabata.
Bayanan sun nuna cewa, a farkon rubu’in bana, darajar jimillar sha’anin fitar da ayyukan hidima na kasar Sin ya kai Yuan biliyan 704.52, wanda ya karu da kashi 11.2% idan aka kwatanta da na shekarar da ta gabata, yayin da a bangaren shigo da ayyukan hidima, ya kai Yuan biliyan 1118.38, wanda ya ragu da kashi 2.6%.
Gibin cinikayyar ayyukan hidima ya kai Yuan biliyan 413.86, wanda ya ragu da Yuan biliyan 100.15, idan aka kwatanta da makamancin lokaci na shekarar da ta gabata.
Fitar da ayyukan hidima masu alaka da ilimin sana’o’i, da kimiyar kirkire-kirkire da sauransu na ci gaba da saurin karuwa. A rubu’in farko, darajar irin wannan hidima da Sin ta fitar ta kai Yuan biliyan 384.26, wanda ya karu da kashi 6.1% idan aka kwatanta da shekarar da ta gabata.
Daga cikinsu, ayyukan hidima na al’adu, da nishadi na jama’a, da hada-hadar kudi sun kasance mafi saurin karuwa, inda suka karu da kashi 25.6% da kuma 16.1%. A bangaren shigo da irin wadannan hidimomi, jimilar ta kai Yuan biliyan 409.45, wadda ta ragu da kashi 2.3% bisa na makamancin lokaci na bara. (Mai Fassara: Amina Xu)
Discussion about this post