Kwanan nan, kafafen yada labarai na Jamus da Birtaniya sun bayyana cewa, killace mashigar tekun Hormuz ya haifar da mummunar matsalar makamashi da ba a taba ganin irinta a cikin shekaru hamsin da suka gabata ba, amma Sin na da karfin jure mummunan tasirin matsalar, saboda tsare-tsaren makamashi na hangen nesa da ta tsara shekaru goma da suka gabata.
Shafin yanar gizo na mujallar Der Spiegel ta Jamus ya nuna cewa, Sin ta riga ta shirya tsaf don fuskantar irin wannan matsala, ba wai kawai mai da iskar gas ta adana ba, har ma da kayan aikin samar da makamashi wanda ake sabuntawa, inda kason kayayyakin nata a duniya ya kai kashi 70-85%.
Jaridar Financial Times ta Birtaniya ta ruwaito cewa, a shekara ta 2014, shugabannin Sin sun daga matsayin tsarin makamashi gaba, tare da karkata zuwa hanyar “kasa mai amfani da wutar lantarki” don kare tsaron makamashin.
Labarin ya ruwaito maganar farfesa masanin makamashi da siyasar kasa da kasa na jami’ar Rice ta birnin Houston na Amurka Jim Krane yana cewa, karfin sabbin makamashi na Sin suna amfanar wasu kasashe, kuma ga Turai, amfani da makamashi daga Sin ya fi dogaro da mai da iskar gas na Rasha da Amurka. (Amina Xu)w
