Kamfanin gine-ginen layin dogo na kasar Sin (CRCC), ya ce ya kammala shimfida hanyar jirgin kasa a gadar PK330, wato gadar layin dogo na dakon kayayyaki masu nauyi, mafi tsawo a nahiyar Afrika. Wannan wani muhimmin ci gaba ne a aikin shimfida layin dogon a yankin hakar ma’adinai dake yammacin Algeria.
Shimfida hanyar jirgin a kan gadar mai tsawon kilo mita 6, wadda ta ratsa rairayi mai tafiya da duwatsu a lardin Tindouf mai tazarar kilomita 1,250 daga kudu maso yammacin birnin Algiers, ita ce bangare mafi sarkakiya a aikin shimfida layin dogon mai tsawon kilo mita 575, da ya hada lardin Bechar da yankin Gara Djebilet mai arzikin karafa, kuma daya daga cikin irinsa mafi girma a duniya.
CRCC ta ce tawagogin Sin da na Algeria sun yi aikin cikin yanayi mai tsanani na hamada, da ya hada da tsananin zafi da guguwar rairayi da karancin ruwa. An kuma aiwatar da sauye sauye a aikin, inda aka zuba siminti da dare da amfani da dabarun sanyaya shi domin tabbatar da aminci da ingancin aikin.
An kammala ginin babban bangaren gadar ne cikin shekara daya kacal. A cewar CRCC, aikin ya samar da guraben aikin yi sama da 7,000, kuma ya horar da ma’aikata sama da 1,000, lamarin da ya samu jinjina daga manyan jami’an Algeria.
Aikin layin dogon ya kunshi gadoji 19, inda jimilar tsawonsu ta kai kilomita 12.2(FMM)
